Хвіліна творчасці

Паспрабуйце зрабіць выраб, які не толькі можа спатрэбіцца Вам штодзень, але будзе выдатным падарункам для сяброў і блізкіх!

Вам спатрэбяцца: Палачкі карыцы, квадратны кавалак фанеры або шчыльнага кардону (роўны даўжыні палачак карыцы), драўляныя “кругляшкі” (для ножак), суперклей, акрылавая фарба карычневага колеру, кавалак шпагату.
   
   Як зрабіць?
    1. Суперклеем прыклеіць да фанеры ножкі.
    2. Пафарбаваць загатоўку фарбай карычневага колеру і пачакаць, пакуль падсохне.
    3. Прымацаваць палачкі карыцы пры дапамозе шпагату і клею да загатоўкі з фанеры ці кардону. Для гэтага трэба звязаць палачкі, раўнамерна размеркаваўшы іх па паверхні загатоўкі.
    4. Замацаваць канцы шпагату вакол ножак загатоўкі.
    5. Гатова!
    Такая вельмі простая падстаўка пад гарачае сваімі рукамі будзе цешыць Вас сваім водарам.
   
    Цёплых і духмяных вечароў Вам, дарагія Чытачы!

6 снежня ка­толікі ўша­ноў­ваюць памяць святога Мікалая, заступніка ван­дроў­цаў і дзяцей.

З гістарычных хронік пра зямное жыццё святога Мікалая вядома мала. Ён нарадзіўся на тэрыторыі сучаснай Турцыі прыкладна ў 270 годзе, а памёр 6 снежня 346 года. З маладых гадоў Мікалай прысвяціў сябе служэнню Богу, быў біскупам. Падчас ганенняў на хрысціян Мікалай быў у турэмным зняволенні, але нягледзячы на гэта працягваў прапаведаваць хрысціянства. Пасля прыходу да ўлады імператара Канстанціна, калі пераслед хрысціян спыніўся, Мікалай ізноў стаў кіраваць сваёй паствай. †

Кухар спёк у печы смачную булачку-завітушку.
Яму трэба пачаставаць гэтай булачкай шмат чалавек.
Як адным узмахам нажа разрэзаць гэтую завітушку на як мага большую колькасць кавалкаў з умовай, што рэзаць завітушку трэба толькі па прамой?
Дапамажыце кухару рашыць задачу.

У 19-м нумары газеты “Слова Жыцця” (ад 16 кастрычніка 2011г.) была апублікавана “Галаваломка для тых, хто любіць салодкае”. Змяшчаем адказ на пытанне галаваломкі.
Калі разрэзаць булачку так, як гэта паказана на малюнку, то дзесяць шчасліўчыкаў змогуць пачаставацца завітушкай, але толькі адзін атрымае вялікі кавалак і добра пад’есць.

Навошта выкідаць скрынкі ад тэхнікі, калі можна зрабіць з іх такія прыгожыя і функцыянальныя прадметы, як, напрыклад, падстаўка для кубка з гарачай гарбатай.

Што спатрэбіцца?
- кардон
- нажніцы ці канцылярскі нож
- клей ПВА
- дэкаратыўная стужка

Як зрабіць?
1. Выражце з кардону некалькі палосак адной шырыні (калі на кардоне ёсць хвалі, то рэжце папярок іх, а не ўздоўж) і рознай даўжыні: адну палоску сярэдняй даўжыні, некалькі кароткіх і адну доўгую.
2. Спачатку зрабіце цэнтральны элемент вырабу. Для гэтага шчыльна скруціце ў рулон палоску сярэдняй даўжыні, затым склейце рулон, сцісніце яго пальцамі і хвілінку патрымайце, каб выраб не расклеіўся.
3. Паўтарыце гэта ж з кароткімі палоскамі. Скруціце столькі рулонаў з кардону, каб хапіла на ўсю акружнасць цэнтральнага элемента вырабу.
4. Прыклейце гэтыя элементы да цэнтральнага рулона.
5. Замацуйце сабраныя элементы доўгай палоскай, каб яны не расклеіліся.
6. Упрыгожце выраб дэкаратыўный стужкай.