Ян 18, 33b–37

Пілат спытаўся ў Езуса: “Ты Кароль юдэйскі?”. Езус адказаў яму: “Ці ад сябе ты кажаш гэта, ці іншыя сказалі табе пра Мяне?”. Пілат адказваў:
    “Ці ж я юдэй? Твой народ і першасвятары выдалі Цябе мне. Што Ты зрабіў?”. Езус адказаў: “Валадарства Маё не з гэтага свету. Калі б з гэтага свету было Маё Валадарства, то слугі Мае заступіліся б за Мяне, каб Я не быў выдадзены юдэям. Але цяпер Маё Валадарства не адгэтуль”. Пілат сказаў Яму: “Значыць, Ты Кароль?”. Езус адказаў: “Ты кажаш, што Я Кароль. Я для таго нарадзіўся і для таго прыйшоў на свет, каб засведчыць аб праўдзе. Кожны, хто ад праўды, слухае голас Мой”. †

Атрымаць і перадаць далей
   Прыклад любові дае нам Езус. Яна з’яўляецца “сэрцам” Яго жыцця і навучання. Але з усіх учынкаў любові, якія здзейсніў наш Збаўца на зямлі, ніводзін не гаворыць больш, чым Яго смерць на крыжы. Езус сам сказаў: “Ніхто не мае большай любові за тую, калі хто жыццё сваё аддае за сяброў сваіх” (Ян 15, 13).
    Кожнаму з нас неабходна ведаць, што ён любімы. Калі не адчуваем сябе любімымі, мы не можам любіць іншых. Так адбываецца таму, што любоў – гэта менавіта даванне сябе. А калі не лічым сябе каштоўнымі і любімымі, то баімся даваць сябе іншым. Бо ніхто не дорыць танныя рэчы таму, каго шануе і кім захапляецца. Езус, паміраючы за нас на крыжы, даў нам надзвычай моцны і выразны знак таго, што мы любімыя Ім, а значыць, здольныя любіць іншых.
    Хрыстос, Кароль Любові, памёр на крыжы, як злачынец, каб мы былі збаўлены. Быў катаваны, каб мы ацаліліся. Цярпеў бесчалавечнае прыніжэнне, каб мы ўзняліся. Быў адкінуты людзьмі, каб мы былі прыняты Айцом у Нябёсах. “І да злодзеяў залічаны быў”, каб мы маглі стаць святымі. Ён даў сябе “перамагчы на крыжы”, каб мы сталі пераможцамі і разам з Ім уваскрэслі ды дасягнулі Неба.
    Самая лепшая падзяка за Божыя дары – тое, што аддаём іх іншым. Таму давайце любіць іншых і дзяліцца з імі тым, што атрымліваем ад Бога. Гэта будзе з нашага боку найлепшая падзяка Хрысту Валадару за Яго неспасціжную любоў да нас.
   
   Пане Езу Хрысце, навучы мяне дзяліцца з іншымі тым, што я атрымліваю ад Цябе кожны дзень!