Езус сказаў сваім вучням: “Як было ў дні Ноя, так будзе і ў час прыйсця Сына Чалавечага. Бо, як у дні перад патопам елі, пілі, жаніліся і выходзілі замуж аж да таго дня, калі Ной увайшоў у каўчэг, і не ведалі, пакуль не прыйшоў патоп і не забраў усіх: так будзе і ў час прыйсця Сына Чалавечага. Тады двое будуць у полі: адзін будзе ўзяты, а другі пакінуты. Дзве будуць малоць на жорнах: адна будзе ўзятая, а другая пакінутая. Таму чувайце, бо не ведаеце, у які дзень Пан ваш прыйдзе. Бо ведаеце, што калі б гаспадар дому ведаў, у якую варту прыйдзе злодзей, дык не спаў бы і не даў бы падкапаць дом свой. Таму і вы будзьце гатовыя, бо Сын Чалавечы прыйдзе ў тую гадзіну, калі вы не думаеце”. †

Час чакання
   Жыццё неаднойчы складаецца з чакання: вясны, заробку, зручных абставін, адпачынку, сустрэчы… У Евангеллі таксама знаходзім мноства апісанняў чакання. Слугі чакаюць вяртання свайго Пана. Панны са светачамі ў руках чакаюць жаніха. Гаспадар чакае, пакуль зямля прынясе ўраджай. Апосталы ў Аліўным садзе падаюць, змораныя сном, чакаючы вяртання Настаўніка, які маліўся перад Мукай...
    У кожным з гэтых фрагментаў гадзіна выканання абяцання застаецца невядомай.
    Штогод на пачатку Адвэнту мы чуем заклік: “Таму чувайце, бо не ведаеце, у які дзень Пан ваш прыйдзе”. Як хрысціяне павінны нястомна чакаць прыходу Пана і быць да яго гатовымі. У такім выпадку гэта будзе бласлаўлёны час, які стане шансам, каб у сэрцы, напоўненым смуткам, выспявала ласка.
    Просім Усемагутнага аб падтрымцы ў нашых намаганнях і дапамозе, каб праз добрыя ўчынкі годна падрыхтавацца да сустрэчы з Хрыстом.

● Як буду рыхтавацца да сустрэчы з Панам падчас сёлетняга Адвэнту? ● Ці мае пастановы на перыяд радаснага чакання вядуць да паглыблення адносін з Богам?