•  Колькасць пілігрымаў, якія прыбылі ў Рым з пачатку Святога года, перавысіла 13 млн. чалавек. Былі падлічаны тыя вернікі, якія прайшлі праз Святыя дзверы ў базіліцы св. Пятра і прынялі ўдзел у цырымоніях Года міласэрнасці. Аб гэтым паведаміла Рада па справах новай евангелізацыі, якая арганізуе гэтыя мерапрыемствы. Нягледзячы на напружаную сітуацыю і тэрарыстычную пагрозу, колькасць вернікаў пастаянна павялічваецца. У раёне Ватыкана былі ўведзены надзвычайныя меры бяспекі.†

    • У жніўні Бюро апостальскай дабрачыннасці ініцыявала акцыю для бедных. “Мы збіраем нашых бяздомных з ваколіц плошчы св. Пятра, – распавядае папскі дабрадзей арцыбіскуп Конрад Краеўскі, – і ў другой палове дня едзем на мора. Пасля – на вячэру ў піцэрыю. Размаўляем... Гэта аднаўленне годнасці і, такім чынам, дзяленне тым, што для нас дасягальнае і нармальнае”. Дарэчы, падчас курортнага сезону многія дабрачынныя арганізацыі прыпыняюць сваю дзейнасць, ватыканскія ж – працуюць увесь час.
   
   •  Касцёл прызнаў аб’яўленні св. Юзафа ў мясцовасці Ітапіранга (Бразілія) у 1994–1998 гг. У іх абраннік Марыі даў чалавецтву два абяцанні: тыя, хто прысвячаюць сябе ўшанаванню яго сэрца, атрымаюць падтрымку на штодзённым шляху да святасці; і ўсе, хто будзе рабіць дабро (асабліва ў адносінах да найбольш патрабуючых: хворых і паміраючых), атрымаюць у апошні момант жыцця ласку добрай смерці. У сваім пасланні св. Юзаф таксама абяцаў: “Усе грэшнікі, нават тыя, хто здзейсніў найгоршыя грахі, могуць верыць у Божую любоў і прабачэнне, а таксама ў мяне, у маю падтрымку”.
     
   •  Дзяржава не можа садзейнічаць ідэалогіі, якая нішчыць грамадства. На гэта ўказваюць біскупы Калумбіі, рэзка супраціўляючыся спробам увядзення ў школы краіны абавязковага навучання на тэму гендэр. Іерархі нагадваюць, што вывучэнне ў школе ідэалогіі гендэр падрывае аўтаномію адукацыі, свабоду сумлення, а таксама права бацькоў прымаць рашэнне аб выхаванні сваіх дзяцей.
   
   • Ірландскі суд першай інстанцыі прызнаў, што слова “ненароджаны”, згодна з Канстытуцыяй краіны, азначае “ненароджанае дзіця”. Таму дзіця ва ўлонні маці мае права на жыццё, а таксама шэраг іншых правоў. Суд падкрэсліў, што ненароджанае дзіця мае “значныя” правы і прававое становішча, якое выходзіць далёка за рамкі права на жыццё. Суддзя Рычард Хамфрыс адзначыў, што Канстытуцыя Ірландыі патрабуе абароны ўсіх дзяцей, незалежна ад таго, нарадзіліся яны ці не.

сredo-ua.org; pch24.pl; niedziela.pl