Забраныя з Лесбас
дзякуюць Папе
   Сірыйскія сем’і, якія Папа забраў з сабой з вострава Лесбас у Рым, усё яшчэ не могуць паверыць у шчасце, якое іх спаткала. “Ніводзін мусульманскі рэлігійны кіраўнік, ніводзін арабскі прэзідэнт не зрабіў для нас таго, што зрабіў Папа”, – адзначаюць бежанцы.
   
   Пакуль што яны пасяліліся ў прытулку, які ўтрымлівае супольнасць св. Ідзія, і там пачынаюць нармальнае жыццё. Дзеці пайшлі ў школу, а бацькі – на моўныя курсы.
    Папа Францішак знаходзіўся на грэчаскім востраве Лесбас 16 красавіка. Падчас пяцігадзіннага візіту ён наведаў лагер для бежанцаў, у якім пражываюць 2,5 тысячы чалавек, што шукаюць прытулку. Іерарх паабедаў з імі і памаліўся за тых, хто патануў у Эгейскім моры, перапраўляючыся ў Грэцыю. Гэта было 13-ае замежнае падарожжа Пантыфіка. †

---

40 тысяч
матацыклістаў
на Яснай Гары
   Прама з галоўных юбілейных урачыстасцей хросту Польшчы на Ясную Гару прыбыў ХІІІ Матацыклетны зорны злёт імя кс. Улана Здзіслава Пэшкоўскага. З малітвай за Польшчу і палякаў на адкрыццё сезона і па бласлаўленне прыехала каля 40 тысяч матацыклістаў не толькі з Польшчы, але і з-за мяжы.
   
   Як падкрэслівае каман- дзір Віктар Вэнгжын, ініцыятар і арганізатар злёту, галоўная яго мэта – захаванне памяці пра Крэсы: “Мы адзін народ, і, нягледзячы на тое, што нас раздзялілі межы, не хочам забіраць у іх Вільню і Львоў, але прагнем мець туды доступ і ездзіць у гэтыя святыя польскія месцы”.
    Менавіта па гэтай прычыне там арганізуюцца Катыньскія рэйды, пілігрымкі ў месцы пакут і сустрэчы з палякамі, будуюца школы, бібліятэкі і касцёлы. Матэрыяльным выражэннем памяці пра Крэсы быў збор дароў на Яснай Гары, у тым ліку цацак, якія трапяць у дзіцячыя дамы на Усходзе.
   

---

I Кангрэс сямейных
рухаў у Беларусі
   Кангрэс, арганізаваны Радай па справах сям’і пры Канферэнцыі Каталіцкіх Біскупаў у Беларусі, пройдзе 13–15 мая ў Баранавічах. Ён будзе прысвечаны тэме прабачэння ў сям’і.
   Мерапрыемства аб’яднае разам прадстаўнікоў сямейных рухаў, катэхетаў і выпускнікоў Школы сямейнага жыцця з Гродна і Мінска. Акрамя дакладаў, праграма ўключае працу ў групах метадам “адкрытай прасторы”. Вынікам працы стане дакумент, апрацаваны кіраўнікамі дыскусійных груп. Ён будзе датычыць вельмі важнай тэмы прабачэння – падмурку шчаслівай сям’і. Пытанне разгледзіцца з пункту гледжання псіхалогіі, сацыялогіі, Бібліі і г. д.