Супраць сумлення
   Французскія мэры не маюць права адмовіць у заключэнні сужэнства асобам аднаго полу. Гэта абвясціла найвышэйшая судовая інстанцыя ў Францыі – Канстытуцыйная рада. У адказ на гэта 20 тысяч мэраў падпісалі петыцыю, у якой яны патрабуюць прадаставіць ім права дзейнічаць згодна з сумленнем. Такое права маюць, напрыклад, прадстаўнікі многіх іншых прафесій: урачы, адвакаты, суддзі. Міністр унутраных спраў адказаў, што за адмову ўдзяліць шлюб гомасексуальным парам мэрам пагражае 5 гадоў пазбаўлення свабоды і 75 тысяч еўра штрафу.
    Варта прыгадаць, што Прэзідэнт Франсуа Оланд раней абяцаў мэрам, што ніхто не будзе прымушаць іх удзельнічаць у заключэнні аднаполых шлюбаў. Аднак мэры не здаюцца і абяцаюць, што накіруюць петыцыю ў Еўрапейскі трыбунал па правах чалавека. †

Ватыканскае радыё

---

   Адмовіцца ад улады ў знак пратэсту супраць абортаў  
    Прэзідэнт Эквадора Рафаэль Карэа абвясціў, што адмовіцца ад сваёй пасады, калі кангрэс краіны легалізуе аборт у межах рэформы крымінальнага кодэкса. Тэрмін паўнамоцтваў Прэзі­дэнта заканчваецца ў 2017 годзе, але Рафаэль Вінсэнтэ Карэа Дэльгада лічыць сябе левым палітыкам, гуманістам і католікам. Ён быў выбраны ў 2013 годзе большасцю галасоў жыхароў Эквадора. У інтэрв’ю на тэлебачанні ён паведаміў, што некаторыя члены яго кааліцыі выказваюцца на карысць легалізацыі абортаў, нягледзячы на тое, што ведаюць пазіцыю Прэзідэнта, які дакладна акрэсліў сваю думку на гэтую тэму.

catholicnews.org.ua

---

   Звыш двух мільёнаў вернікаў у працэсіі 
    У паўночнай Бразіліі, у Бэлем, адбылася 221-я працэсія ў гонар Панны з Назарэта. Незвычайнасць гэтай працэсіі заключалася ў тым, што ў ёй прымала ўдзел звыш двух мільёнаў вернікаў. У сёлетнім святкаванні ўдзельнічаў таксама прадстаўнік Святога Айца кард. Тарчызіа Бертонэ, праз якога Папа перадаў спецыяльнае пасланне для вернікаў разам з апостальскім бласлаўленнем. Своеасаблівым феноменам працэсіі з’яўляецца доўгая вяроўка, прычэпленая да трона, на якім стаіць фігура Маці Божай. Гэта звязана з тым, што некалі падчас праліўных дажджоў дарога стала балотам, праз якое цягнулі фігуру, і гэты звычай застаўся да сённяшняга дня. Для пілігрымаў з’яўляецца гонарам магчымасць трымацца за гэтую вяроўку. Кожны год да Маці Божай у штаце Пара прыбывае ўсё больш пілігрымаў з краіны і з замежжа.

 www.credo-ua.org