Мы стаім у Каляднай пячоры пры зорцы, якая, паводле хрысціянскай традыцыі, паказвае месца гэтай вялікай падзеі. Але мы верым, што Хрыстос прыходзіць таксама і цяпер, што Ён з намі ў гэтай святой літургіі, якая ўвекавечвае Яго жыццё, смерць і змёртвыхпаўстанне. Знак таго, што Сын Божы прыйшоў на свет як беднае Дзіцятка, для якога не было месца ў заездзе, калі Яго народ быў падпарадкаваны чужому валадаранню. Ён прыйшоў невядомы нікому, і толькі простыя пастухі сабраліся каля Яго ясляў. Аднак Ён з’яўляецца тым Дзіцяткам, пра якое папярэджваў вялікі прарок, каб уваскрасіць веру прыгнечанага народу. У Ім злучаюцца неба і зямля, Божыя справы са справамі чалавечымі. Ён як Збаўца аддасць Сябе за нас і назаўсёды прыме нас ва ўласнасць... †

Сустракаючы сёння Езуса ў Бэтлеемскай стайні, давайце не будзем забываць пра тое, што мы штодзённа сустракаем Яго ў нашых бліжніх, а асабліва ў кожным хворым, адзінокім, бедным, у кожным чалавеку, які патрабуе нашай дапамогі. Калі мы хочам быць вернымі таму, што нам перасылаюць святы Божага Нараджэння, іх глыбокаму сэнсу, давайце зробім усё, каб у нашым сэрцы заўсёды было месца для іншага чалавека.