Папа Бэнэдыкт XVI
    У сённяшнім Евангеллі, якое апавядае гісторыю ўваскрашэння Лазара, мы чуем голас веры з вуснаў Марты, сястры Лазара. Езус кажа ёй: «Уваскрэсне брат твой», яна адказвае: «Я ведаю, што ўваскрэсне падчас уваскрэсення ў апошні дзень» (Ян 11, 23-24). Але Езус гаворыць: «Я ўваскрэсенне і жыццё. Хто верыць у Мяне, калі нават і памрэ, будзе жыць» (Ян 11, 25-26). Вось сапраўдная навіна, якая ўрываецца і ламае ўсе бар'еры! Хрыстус разбівае сцяну смерці, і ў Ім жыве ўся паўната Бога, якая з’яўляецца жыццём, жыццём вечным. Таму смерць не мела над Ім улады, а ўваскрашэнне Лазара з'яўляецца знакам Яго поўнага панавання над фізічнай смерцю, якая для Бога з’яўляецца нечым накшталт сну (пар. Ян 11,11).

    Падчас малітвы “Анёл Панскі”, 10.04.2011 †

 
  Кс. арцыбіскуп Тадэвуш Кандрусевіч
   Дзень 13 красавіка 1991 г. прыпадаў на Велікодны перыяд. У гэтым годзе мы ўжо зусім хутка будзем святкаваць Вялікдзень. 20 гадоў таму гэты дзень для Каталіцкага Касцёла ў нашай краіне стаў новай Пасхай. І гэтая Пасха павінна працягвацца. Нельга жыць толькі гісторыяй. З яе дапамогай трэба вучыцца і на ёй трэба будаваць. А будаваць ёсць што. Жыццё не стаіць на месцы, і разам з ім прыходзяць усё новыя і новыя выклікі. Даводзіцца вырашаць праблемы, аб якіх яшчэ зусім нядаўна мы нават і не чулі. Большасць з іх унесена ў наша жыццё нарастаючым секулярызмам і лібералізмам.
    Усё больш і больш вернікаў паволі і незаўважальна прымае свецкі стыль жыцця, у якім усё менш і менш месца застаецца Богу.

    Фрагмент “Паслання арцыбіскупа Кандрусевіча з нагоды 20-годдзя ўстанаўлення Мінска-Магілёўскай мітраполіі”

 

---

    Біскуп Aляксандр Kaшкевіч
   Браты і Сёстры! Давайце не будзем забываць пра цяжкія для нашага Касцёла часы, калі мы не мелі сваёй дыяцэзіі і біскупа, калі ў нас не хапала святароў і святынь, калі націск атэізму ствараў пагрозу для веры. Памяць пра гэта дазволіць нам у будучым захаваць вернасць Евангеллю і перадаць яе наступным пакаленням. Трэба вяртацца ў памяці да рэлігійных ганенняў мінулых гадоў, каб цаніць тое, што аплачана коштам вялікіх пакут і выгнання, высылкай і рэлігійнай дыскрымінацыяй святароў і вернікаў нашай зямлі.

    Фрагмент “Пастырскага ліста ксяндза біскупа Кашкевіча з нагоды 20-годдзя дыяцэзіі і перэгрынацыі абраза Міласэрнага Езуса”