Па традыцыі ў Вялікую суботу з самага ранку ва ўсіх касцёлах асвячаюць ежу на велікоднае снеданне. Сёння часцей за ўсё мы ідзём у касцёл з кошычкамі для асвячэння ежы. Паводле традыцыі кошычак засланы ўнутры белай сурвэткай, на якую пакладзена ежа для асвячэння. Ён павінен быць аздоблены, напрыклад: вербавымі коцікамі ці веснавымі кветачкамі і прыкрыты белай сурвэткай. Кошычак для асвячэння ежы на Вялікдзень павінен быць прыгожы і адначасова просты. У яго неабходна пакласці асноўныя прадукты.
    Хлеб асвячаецца як даніна памяці хлебу, які сышоў з неба, г.зн. Езусу і дзеля ўвекавечання таго, як Ён накарміў цудоўным чынам натоўпы людзей, якія слухалі яго навучанне. Штодзённа мы просім Бога, каб Ён даў нам хлеб. А калі ён ёсць у нас, дзякуючы Божай шчодрасці, то кладзём яго для асвячэння: звыкла для асвячэння бяруць некалькі лустаў хлеба, але некаторыя - і невялікі боханчык хлеба. Некаторыя пякарні вырабляюць спецыяльнае велікоднае печыва з крыжыкамі. †

Велікоднае ягня – сімвал Змёртвыхпаўсталага Езуса, але таксама - пакоры і мяккасці. Велікоднае ягня на стале напамінае пра тое, што Хрыстус збавіў людзей, якія прызначаны для вечнага банкету на свяце Божага Баранка.
    Цяпер ставяць на стол велікодныя ягняткі, зробленыя часцей за ўсё з цукру, усё радзей – з цеста, а яшчэ радзей - з масла. Некаторыя ўпрыгожваюць стол велікоднымі ягняткамі з гіпсу, з фарфору, са шкла, глінянымі, пластмасавымі, зробленымі з авечай воўны.
    Вяндліна з’яўляецца яскравым сімвалам дастатку і заможнасці сям’і. Перш за ўсё асвячаюцца мясныя вырабы са свініны, можна – кавалак грудзінкі, сала ці паляндвіцы.
    Хрысціяне – соль зямлі. Гэты неабходны мінерал не толькі дадае стравам смак, але і з’яўляецца сімвалам захаванасці ад псавання і мае ўласцівасць ачышчаць. Хлеб і соль, як бы сутнасць жыцця, азначаюць яго прастату. Імі вітаюць ганаровых гасцей.
    Чорны перац (молаты) сімвалізуе горкія зёлкі, якія дадавалі габрэі ў пікантны соус charoset (колеру цэглы). Яны мачалі ў ім кавалачкі пасхальнага ягняці, як напамінак аб цяжкай паднявольнай працы пры вырабе цэглы ў Егіпце.
    Хрэн мае пікантны смак і выціскае з вачэй слёзы. Найлепш, калі яго цэлы корань парэзаць на тонкія скрылікі і імі частаваць сабраных. Хрэн можна пацерці і вымешаць з яйком і смятанай.
    Сыр. Найлепш калі ён выраблены з авечага, казінага ці каровінага малака. Звычайна гаспадыня купляе яго на рынку. Прыдасца і тварог, зроблены ў хатніх умовах.
    Яйка – традыцыйны святочны падарунак, аздабленне велікодных кошычкаў і сталоў. Яйка – гэта сімвал плоднасці, жыцця, якое адраджаецца, знак перамогі Хрыста над смерцю.
    Яйкі, звараныя ўкрутую, і пафарбаваныя – асноўны кампанент асвечанай ежы. Калі вернікі дзеляцца яйкамі і жадаюць адзін аднаму ўсяго самага найлепшага, то гэта павінна садзейнічаць умацаванню сямейных і суседскіх сувязяў.