З каталіцкага друку (117)
Актуальна -
Прэса
Студня для
Паўднёвага Судана
“Мешка I” – так будзе называцца студня, якую пабудуюць з нагоды 1050-й гадавіны хросту Польшчы ў Паўднёвым Судане, самай беднай на ваду краіне ў свеце.
Акцыю “Наталяем смагу Судана” праводзіць парафія Найсвяцейшага Сэрца Езуса і св. Фларыяна ў Познані разам з Польскай гуманітарнай арганізацыяй. У ініцыятыве прымаюць удзел амаль 5000 чалавек, сярод якіх вучні, парафіі, скаўты, пажарныя, а таксама палякі з ЗША і Вялікабрытаніі.
Адзін з ініцыятараў акцыі звяртае ўвагу на тое, што для нас відавочна, што з крана цячэ вада, гэта наша штодзённасць. Аднак многія жыхары Зямлі ўсё яшчэ не маюць доступу да чыстай вады. Жыхары Паўднёвага Судана павінны пераадолець у сярэднім каля 4 км, каб дабрацца да крыніцы чыстай вады. А 45% грамадства п’юць атрутую ваду.
†
Папа заклікаў маліцца
аб павазе да жанчын
“Каб ва ўсіх краінах свету жанчыны шанаваліся і паважаліся, і каб іх неад’емны сацыяльны ўклад быў высока ацэнены” – так гучыць першая малітоўная інтэнцыя Святога Айца на бягучы месяц.
Ён абвясціў яе асабіста ў адмысловым відэароліку, нагадваючы аб незаменным укладзе жанчын ва ўсе сферы чалавечай дзейнасці, пачынаючы з сям’і.
“У свеце яшчэ вельмі мала зроблена для жанчын, якія знаходзяцца ў складаных сітуацыях, якімі пагарджаюць, якіх адчужаюць і нават змушаюць да нявольніцтва. Мы павінны асудзіць сексуальнае насілле ў адносінах да жанчын і ліквідаваць бар’еры, якія перашкаджаюць іх поўнай інтэграцыі ў сацыяльнае, палітычнае і эканамічнае жыццё”, – заклікаў Пантыфік.
Армія Святога Айца
адзначыла сваё свята
Урачыстасць адбылася ў гадавіну гераічнай смерці 147 салдат Швейцарскай Гвардыі, якія 6 мая 1527 г. загінулі, абараняючы папу Клямента VII.
Трохдзённае святкаванне распачалося ўрачыстым канцэртам гвардзейскага аркестра. Затым ватыканскія салдаты прынялі ўдзел у святой Імшы, якую для іх адправіў у базіліцы св. Пятра дзяржсакратар кардынал Петра Паралін. Аднак найважнейшым пунктам святкавання была прысяга новых рэкрутаў (сёлета іх 23), складзеная ў Апостальскім палацы на дзядзінцы св. Дамасія. Пасля новых гвардзейцаў разам з іх сем’ямі прыняў на спецыяльнай аўдыенцыі папа Францішак.