3. Вызначыць час Ніхто не ведае, які час найлепш падыходзіць для малітвы. Для гэтага можна выкарыстоўваць кожную хвіліну жыцця: ідучы на працу, едучы ў тралейбусе, гуляючы па вуліцы, седзячы дома на ложку... Не бойцеся шукаць і спрабаваць – і знойдзеце! Не хвалюйцеся, калі не ўсё адразу будзе падыходзіць.
4. Пачаць Вельмі часта можна сустрэць людзей, якія не бяруцца за ружанец, бо баяцца, што не будуць адпавядаць. Кажуць: “Навошта пачынаць, калі я не змагу стрымаць абяцанне і маліцца кожны дзень?”. Трэба адважыцца на гэты крок і паспрабаваць. Далей Бог сам пакіруе ў гэтай малітве.
5. Прасіць аб ласцы і разважаць Многія адмовіліся ад ружанцовай малітвы, не ведаючы, як сумясціць адгаворванне “Анёльскага прывітання”, лічэнне пацерак і разважанне таямніц. Ці рэальна ўсё гэта выконваць адначасова? А дзе тады месца на сузіранне? Насамрэч, малітва не грунтуецца на дасканаласці. Яна з’яўляецца Божым дарам. Пачніце з таго, што вам бліжэй. Дазвольце Духу Святому кіраваць сабой.
Не наракайце на адсутнасць канцэнтрацыі, няўважлівасць ці іншыя цяжкасці. Проста маліцеся так, як можаце. Бог сам падрыхтуе вас да чарговых этапаў малітвы і дасць неабходную ласку. Ружанец – выдатная дарога для аднаўлення адносін з Марыяй. Звяртаючыся да слоў Пана, якія Ён прамовіў праз Анёла, і да таямніц Яе жыцця, нанова знойдзем сваё месца і адновім адносіны з Той, каго сам Бог даў нам за Маці.
Папа Пій XII у сваёй энцыкліцы “Ingruentium malorum” пісаў: “Не вагаючыся, яшчэ раз пацвярджаем публічна, што ўскладаем вялікія надзеі на святы Ружанец як на сродак вылячэння ад зла, якое засмучае нашы часы. Не са зброяй у руках, не з дапамогай чалавечай сілы, а толькі з дапамогай Божай, аб якой просім у гэтай малітве, зможа каталіцкі Касцёл, як Давід са сваёй прашчой, выйсці супраць свайго адвечнага ворага...”.
І гэта сапраўды так. Ведаю шмат малітваў з просьбай аб дапамозе, але найбольш “плённай” лічу Ружанец. Малюся ім, калі ў маім жыцці адбываецца што-небудзь дрэннае, калі хачу падзякаваць Богу за тое, што ў мяне ёсць, за здароўе сваё і блізкіх, калі патрабую падтрымкі. Для мяне гэтая малітва мае вялікае значэнне.
Прамаўляючы “Вітай, Марыя...”, праз рукі Маці мы даручаем Божай міласэрнасці людзей, за якіх молімся. А хіба можна зрабіць нешта лепшае для нашых братоў і сясцёр?
Д
ля мяне ружанцовая малітва з’яўляецца асаблівай, таму што гэта, па сутнасці, душэўная размова з нашай Нябеснай Мамай. Дзякуючы Ружанцу я магу паразважаць аб жыцці Марыі і Хрыста, уявіць сабе ўсё, што адбывалася з Імі. Гэта таксама магчымасць даверыць Маці Божай свае цяжкасці і перажыванні, навучыцца ў Яе цярплівасці, дабрыні і любові.
Малітва на ружанцы прыносіць супакой і дапамагае прыняць розныя складаныя сітуацыі. Важна памятаць, што падчас гэтай малітвы трэба дзяліцца не толькі сваімі праблемамі, але і радасцямі, бо Марыя знаходзіцца побач з намі як у бедах і хваробах, так і ў шчаслівых момантах жыцця.
Ружанцовая малітва – гэта размова з Богам. Нездарма папа Леў ХIII заклікаў да яе: “Няма нічога больш прыгожага, чым шматлікія галасы, каторыя ва ўсіх кутках Зямлі няспынна моляцца і адначасова звяртаюцца да Найсвяцейшай Панны Марыі, разважаючы таямніцы святога Ружанца. Няхай хрысціянскія народы шукаюць заступніцтва Божай Маці з дня ў дзень з нарастаючым запалам; няхай яны ўсё часцей моляцца святым Ружанцам, выкарыстоўваючы яго не толькі як сродак ад няшчасцяў, але і як сапраўдны сімвал хрысціянскай набожнасці!”.
Асабіста для мяне такі від малітвы вельмі важны, бо, адгаворваючы Ружанец, я магу паразважаць аб жыцці Езуса і Маці Божай, а таксама асаблівым чынам падзякаваць Богу або папрасіць Яго аб нечым для сябе ці сваіх блізкіх. Ружанец дазваляе праявіць цярплівасць ў малітве. Прамаўляючы таямніцу ці цэлую частку, мы паказваем Богу, што ўсведамляем важнасць гэтай малітвы і гатовыя ахвяраваць для яе свой час.
У паўсядзённым жыцці мы часта тэлефануем маме, каб падзяліцца смуткам альбо радасцю, папрасіць дапамогі ці парады ў цяжкіх сітуацыях. Гэтак жа мы “тэлефануем” да нашай Цярпліва Слухаючай Нябеснай Маці, калі бярэм у рукі ружанец і пачынаем маліцца. Я часта паўтараю, што слова “ружанец” паходзіць ад слова “ружа”. Таму кожнае прамоўленае “Вітай, Марыя” – гэта прыгожая кветка для Маці Божай, а ўвесь Ружанец – шыкоўны букет. Яго мы з удзячнасцю і любоўю дорым нябеснай заступніцы, якая ўзносіць да Бога ўсе нашы патрэбы і просьбы. У кастрычніку – ружанцовым месяцы – трэба асаблівым чынам памятаць пра малітву, дзякуючы якой вучымся разважаць найважнейшыя праўды Евангелля. Маліцца не толькі індывідуальна, але і супольна: прыходзіць у святыню, прымаць удзел у ружанцовых набажэнствах, – паколькі такая малітва мае яшчэ большую сілу. “Дзе двое ці трое сабраліся ў імя Маё, там Я ёсць сярод іх” (параўн. Мц 18, 19–20). У Гродзенскай дыяцэзіі існуюць супольнасці Жывога Ружанца, у склад якіх уваходзіць па 20 чалавек. Яны штодзённа моляцца на працягу месяца, ахвяруючы свой час для Маці Божай і прадстаўляючы Ёй інтэнцыі: уласныя і ўсяго Касцёла. Я прагну, каб прыгожая ружанцовая малітва не засталася толькі на вуснах старэйшага пакалення. Таму заахвочваю дзяцей і моладзь актыўна далучацца да “марыйнай ружанцовай школы”. |
|