Ксёндз Юрый Папялушка нарадзіўся ў 1947 г. у вёсцы Акопы на Падляссі. Ужо як міністрант ён вылучаўся глыбокай рэлігійнасцю. Пасля заканчэння школы 24 чэрвеня 1965 г. паступіў вучыцца ў Вышэйшую мітрапалітальную духоўную семінарыю ў Варшаве. Пасля першага году навучання ён быў накіраваны на прымусовую вайсковую службу, якую праходзіў у спецыяльным падраздзяленні ўзмоцненай дысцыпліны для клерыкаў у Бартошыцах. 28 мая 1972 г. Юрый атрымаў святарскія пасвячэнні з рук прымаса кардынала Стэфана Вышынскага. З 1978 г. займаўся душпастырствам у Варшаве ў касцёлах: імя Дзіцятка Езус, імя св. Ганны, а пазней – імя св. Станіслава Косткі. Ён стаў душпастырам медработнікаў у Варшаве. Са жніўня 1980 г. быў звязаны з асяроддзямі рабочых, актыўна падтрымліваў прафсаюз “Салідарнасць”. †

Валерый Яўсейчык, Гродна
    У Лядніцу я прыехаў чацвёрты раз. Лядніца была заўжды для мяне тым месцам, дзе я магу засяродзіцца на малітве, задумацца над тым, што я - не ідэальны. І заўжды хочацца вярнуцца сюды ў чарговы раз. Галоўная тэма сёлетняй сустрэчы: “Жанчына – гэта дар і таямніца”. Найбольш спадабалася мне выступленне Ванды Пултаўскай. Я чытаў крыху яе кнігі, там ёсць шмат цікавага, а са старонкаў яе твораў сучасная моладзь магла б многае пачарпнуць. В. Пултаўская закранае ў сваіх творах вельмі важныя тэмы: любоў, сексуальнае жыццё, адносіны паміж жанчынай і мужчынам. В. Пултаўская прадэманстравала на лядніцкіх палях кнігу: “Eros et juventus”. Ужо дома я пачаў крыху яе чытаць і знайшоў штосьці карыснае для сябе. Яшчэ шмат можна пісаць пра гэтую сустрэчу, але я хацеў бы звярнуць увагу на штосьці іншае. Той, хто быў на сустрэчы не першы раз, то мог убачыць, што важным элементам лядніцкіх сустрэчаў з’яўляўся танец з песнямі. Як гаворыцца ў нас, што песня – гэта двайная малітва, а песня з танцам – трайная. Кожны год галоўную песню спяваюць некалькі разоў і танцуюць на працягу ўсёй сустрэчы, а для ўсіх няма розніцы, хто стаіць побач з табой, адкуль ён прыехаў і, нават, якое носіць імя. Кожны год на сустрэчы збіраецца 70, 80 тысяч маладых людзей і пасля яе мы вяртаемся ў свае краіны і з дапамогай гэтай песні мы нясём атмасферу энтузіязму веры ў нашыя супольнасці, парафіі. Хто з моладзі не ведае сёння такіх песень: “Падымі мяне, Езу”, “Не бойся, выплыві на глыбіню” – гэта песні з Лядніцы. Такая з’ява стала ўжо своеасаблівай тэндэнцыяй. І для пацвярджэння маіх разважанняў мне хацелася б прывесці словы айца Яна Горы: “Мы не спяваем у Лядніцы, над ёй мы ўсе становімся песняй!” Я хачу і далей быць гэтай песняй! †

У гэтым годзе споўнілася першая гадавіна каранацыі цудоўнага абраза Тракельскай Божай Маці папскімі каронамі. Гэтая значная для нашай дыяцэзіі і ўсёй Беларусі ўрачыстасць адбылася 5 ліпеня 2009 г.

Варта ўспомніць пра гэтыя цудоўныя хвіліны для тысячаў вернікаў, святароў, сёстраў з манаскіх ордэнаў з Беларусі і з-за мяжы. Усе, хто прымаў удзел у гэтых урачыстасцях, паддаліся ў гэты дзень настрою веры, адчулі велічную сілу ўзрушэння і аб’яднання. А каб гэта адчуць, моладзь, дарослыя і людзі старэйшага пакалення пераадолелі дзесяткі кіламетраў. Якім жа трапным аказаўся дэвіз мінулагодняй пілігрымкі да Тракельскай Божай Маці: “Марыя! Я ёсць, памятаю, пільны!” Гэтыя словы адлюстравалі сэнс таго, як быць хрысціянінам у новым тысячагоддзі, у новай эпосе гісторыі Касцёла і народаў. Цэнтральным пунктам урачыстасці была св. Імша, галоўным цэлебрантам якой быў кардынал Казімір Свёнтэк, які і ажыццявіў акт каранацыі. Нязвыкла змястоўна выказаўся арцыбіскуп Тадэвуш Кандрусевіч у сваёй гаміліі пра важнасць гэтай падзеі: “Гэта – цуд свабоды веравызнання, беручы пад увагу папярэднія гады ганенняў, атэізму і сённяшнюю пару секулярызацыі. Каранацыя – гэта адлюстраванне нашай пашаны да гэтага цудоўнага абраза, адначасова просьба аб дапамозе і аб заступніцтве Марыі...” †

Адэльску прайшло ўрачыстае набажэнства з нагоды 520-ай гадавіны існавання касцёла імя Унебаўзяцця Найсвяцейшай Марыі Панны. Такі ж юбілей адзначала і мястэчка. З пачатку ўрачыстасці біскуп Аляксандр Кашкевіч нагадаў сабраным жыхарам Адэльска, што было гэта каралеўскае мястэчка, вядомае сваімі кірмашамі і славутымі ветранымі млынамі. Гродзенскі ардынарый пажадаў ад усяго сэрца кожнаму, каб святы заступнік апекаваўся імі заўжды. Пазней кожны мог паглядзець шматлікія фотаздымкі, прысвечаныя Адэльску. Прайшла таксама прэзентацыя кнігі а. Юзафа Макарчыка пра Адэльск. Ксёндз-пробашч Валерый Быкоўскі запрасіў усіх да помніка святому Антонію, які быў устаноўлены стараннямі пробашча і парафіянаў на галоўнай вуліцы мястэчка. У 15.00 шматлікія вернікі спявалі песні дзеля ўшанавання св. Антонія. Арцыбіскуп Тадэвуш Кандрусевіч, біскуп Аляксандр Кашкевіч і ксёндз-пробашч Валерый Быкоўскі адкрылі помнік і яго асвяцілі. Культ св. Антонія быў даўно вядомы ў Адэльску, пра што ўспамінаў падчас гаміліі арцыбіскуп Тадэвуш Кандрусевіч. †

Пілігрымка “Гродна – Тракелі”

Запрашаем усіх у супольнае паломніцтва ў санктуарый у Тракелі. Дзякуючы высілкам пешай вандроўкі, мы пабываем на рэкалекцыях у дарозе, будзем дзякаваць за атрыманыя даброты, выпрошваць ласкі і прасіць у Бога, каб Ён прабачыў нашыя грахі.

    Траса: Гродна – Азёры – Астрына – Забалаць –Пагародна – Тракелі.
    Колькасць удзельнікаў: звыш 400 чалавек.
    Пачатак пілігрымкі: 28 чэрвеня ў 9.00 гадзінаў, гродзенская катэдра.
    Падчас адпачынку ля р. Котра пройдзе канцэрт дзяцей з Дому дзіцяці з Галавіч-полля.
    Ксёндз Андрэй Радзевіч †

2 – 3 ліпеня 2010 г.

2 ЛІПЕНЯ, ПЯТНІЦА
21.30 – Марыйны зварот.
21.45 – Адарацыя Найсвяцейшага Сакрамэнту і канферэнцыя (сем’і і святары).
23.30 – Падрыхтоўка да св. Імшы.

3 ЛІПЕНЯ, СУБОТА
24.00 – Марыйная працэсія і св. Імша.
02.00 – Ружанцовая малітва, частка Радасная, (Ліда, касцёл імя св. Сям’і).
03.00 – Вяночак да Божай Міласэрнасці, (Ашмяны, касцёл імя св. Міхала-Арханёла).
04.00 – Канцэрт гурта “Ave” (ВДС, г. Гродна).
05.00 – Гадзінкі ў гонар Беззаганнага Зачацця НМП.
06.00 – Спеў традыцыйных песняў.
07.00 – Падрыхтоўка да св. Імшы
07.30 – Св. Імша, цэлебраваная неопрэзбітэрамі і юбілярамі.
08.30 – Канцэрт экуменічнага ансамбля хрысціянскіх сем’яў (Воранава).
09.30 – Падрыхтоўка да св. Імшы.
10.00 – Адпустовая св. Імша.

7 чэрвеня 2010 г. падчас урачыстай св. Імшы ў парафіі імя НПМ Няспыннай Дапамогі ў Ізабеліне біскуп Аляксандр Кашкевіч удзяліў сакрамэнт Канфірмацыі 12 вернікам з Ізабеліна і Поразава. Ва ўрачыстасцях прыняло ўдзел 12 святароў, у тым ліку ксяндзы-дзеканы: Антоній Філіпчык і Яцэк Маркель. У сваім казанні ксёндз-прафесар Раман Катлімоўскі ўспамінаў пра першую св. Імшу, якая была цэлебравана адразу ж пасля таго, як касцёл быў вернуты і яна ажыццявілася сярод муроў святыні пад адкрытым небам 20 гадоў назад.

8 чэрвеня 2010 г. у гродзенскай катэдральнай базыліцы біскуп Аляксандр Кашкевіч цэлебраваў жалобную св. Імшу за памерлага брата Юзафа Кашкевіча. Разам з біскупам маліліся за памерлага ксяндзы, сёстры з манаскіх ордэнаў і вернікі.

10 чэрвеня 2010 г. распачаў працу дзіцячы аздараўленчы лагер у в. Няцеч (Лідскі р-н), які арганізавала дыяцэзіяльная Карытас. У першую змену ў лагеры адпачывае 65 дзяцей з дыяцэзіі. Сёлета запланавана 5 змен. Духоўным пастырам дзяцей у лагеры з’яўляецца ксёндз Віктар Савіцкі, які быў 14 чэрвеня б.г. назначаны пробашчам парафіі імя св. Міхала-Арханёла ў Няцечы. Дырэктарам лагера з’яўляецца Мацвяенка Ірына Аляксееўна.

11 чэрвеня 2010 г. біскуп Аляксандр Кашкевіч цэлебраваў адпустовую св. Імшу ў парафіі імя Найсвяцейшага Сэрца Езуса ў Канвалішках. Ён удзяліў таксама сакрамэнт Канфірмацыі 50 вернікам. Ксяндзы з усяго дэканату прыбылі на адпуст у Канвалішкі. Урачыстая св. Імша і працэсія з Найсвяцейшым Сакрамэнтам пачалі 40-ка гадзіннае эўхарыстычнае набажэнства дзеля ўшанавання Найсвяцейшага Сэрца Езуса, якое закончылася ў нядзелю св. Імшой і працэсіяй.

12 чэрвеня 2010 г. біскуп Аляксандр Кашкевіч цэлебраваў урачыстую св. Імшу ў парафіі імя Перамянення Пана ў Ваверцы.Ён удзяліў сакрамэнт Канфірмацыі 85 вернікам з парафіі. Ксёндз-дзекан Вінцэнт Лісоўскі і ксёндз-дзекан Станіслаў Пытэль, ксяндзы з дэканату Ліда прыехалі на гэтую ўрачыстасць.

12 чэрвеня 2010 г. біскуп Аляксандр Кашкевіч цэлебраваў урачыстую св. Імшу ў Іўі ў парафіі імя св. апосталаў Пятра і Паўла. Біскуп ажыццяўляў гэтую св. Імшу за III ордэн св. Францішка (Францысканскі ордэн свецкіх). Ва ўрачыстасці ўдзельнічалі айцы-капуцыны і францысканцы, а таксама святары з дэканату. Біскуп указаў у сваім казанні на св. Антонія Падуанскага і на св. Францішка Асізскага як на прыклад для пераймання. Урачыстасць закончылася працэсіяй з Найсвяцейшым Сакрамэнтам.

13 чэрвеня 2010 г., у дзень успаміну пра святога Антонія Падуанскага ў парафіі імя Беззаганнага Зачацця НМП у Квасоўцы адбылося ўрачыстае ўнясенне рэліквій святога, якое здзейсніў біскуп Аляксандр Кашкевіч. Да гэтай ўрачыстасці парафія рыхтавалася, адгаворваючы Навэнну на працягу дзевяці першых аўторкаў месяца (з 6 кастрычніка 2009 г. да 1 чэрвеня 2010 г.). Біскуп Аляксандр Кашкевіч цэлебраваў св. Імшу, а кс. прафесар Раман Катлімоўскі бліжэй пазнаёміў вернікаў у сваім казанні са святым Антоніем Падуанскім і адзначыў, што сёння прыклад святых заахвочвае і нас быць адданымі Богу.
    Падчас св. Імшы быў асвечаны спецыяльна падрыхтаваны хлеб (635 булачак - столькі чалавек налічвае парафія). Згодна з традыцыяй у гэты дзень асвячаецца «хлеб святога Антонія» – такім спосабам згадваецца пра дзейнасць святога на карысць бедных і пакрыўджаных.

14 чэрвеня 2010 г. ў парафіі імя Беззаганнага Зачацця НМП у п. Паўднёвы (г. Гродна) была афіцыйна пачата ІІ дыяцэзіальная парафіяда, у якой прымае ўдзел каля 250 дзяцей. Урачыстую св. Імшу цэлебраваў кс. біскуп Аляксандр Кашкевіч, які прывітаў удзельнікаў парафіяды і паблагаславіў іх. Ксёндз-рэктар ВДС з Гродна Юзаф Станеўскі абвясціў казанне. Да дзяцей таксама звярнуліся з прывітальным словам дырэктар парафіяды кс. Артур Малафей і каардынатар праграмы таварыства “Парафіяда імя св. Юзафа Каласанса” пані Марыя Куель. Пасля св. Імшы адбыўся канцэрт музычнага ансамбля «AVE» з ВДС.

5 чэрвеня 2010 г. у мінскім мікрараёне Лошыца арцыбіскуп Тадэвуш Кандрусевіч асвяціў пабудаваную капліцу. Падчас гэтай урачыстасці вернікі мясцовай парафіі імя Ружанцовай Божай Маці прыступілі да сакрамэнту Канфірмацыі. У будучым на гэтым месцы запланавана будаўніцтва санктуарыя імя Божай Міласэрнасці. З гэтай нагоды мітрапаліт перадаў капліцы абраз Міласэрнага Езуса. Ужо з самага пачатку св. Імшы як гэты абраз, так і абраз бл. кс. Міхала Сапоцькі былі размешчаны ў галоўным алтары новай святыні.
   22 мая б.г. арцыбіскуп Тадэвуш Кандрусевіч асвяціў капліцу імя св. Яна-евангеліста ў іншым мікрараёне Мінска – Кунцэўшчыне.

У парафіі імя св. апостала Андрэя ў Нарачы стала добрай традыцыяй, што ў той дзень, калі ў мясцовых школах адбываюцца выпускныя вечары, школьнікі прыходзяць на агульную малітву ў святыню. У суботу 12 чэрвеня 2010 г. пасля ўрачыстага ўручэння атэстатаў сталасці выпускнікі разам са сваімі настаўнікамі, бацькамі, роднымі і сябрамі прыйшлі ў касцёл (праваслаўныя — у царкву) на святую Імшу, каб падзякаваць Богу за гады навучання ў школе і папрасіць Божага благаслаўлення ў дарослае жыццё, у якое яны ўступаюць.

13 чэрвеня 2010 г. у Рубяжэвічах адзначылі 100-годдзе існавання касцёла імя святога Юзафа. Ва ўрачыстасці прынялі ўдзел мінска-магілёўскі Мітрапаліт, арцыбіскуп Тадэвуш Кандрусевіч, шматлікія святары, сёстры з манаскіх ордэнаў, прадстаўнікі дзяржаўнай улады Мінскай вобласці, Стаўбцоўскага раёна і мясцовага сельсавету.

7-10 чэрвеня 2010 г. у цэнтры імя св. Лукі ў Ляскаўцы адбылася канферэнцыя па стратэгічнаму планаванню на тэму: “Карытас Беларусі: погляд ў будучыню”. Дырэктары рэгіянальных аддзелаў Карытас з Беларусі падзяліліся асабістымі пунктамі гледжання аб будучыні гэтай дабрачыннай арганізацыі, былі акрэслены перашкоды на шляху яе дзейнасці, распрацаваны і прыняты ключавыя ідэі, праекты і напрамкі дзейнасці. Канферэнцыя не засталася без увагі з боку кіраўніцтва Мінска-Магілёўскай архідыяцэзіі: яе пачала св. Імша, якую цэлебраваў біскуп Антоній Дзям’янка, а на падвядзенні вынікаў канферэнцыі прысутнічаў арцыбіскуп Тадэвуш Кандрусевіч.

4–6 чэрвеня 2010 г. Святы Айцец Бэнэдыкт XVI наведаў Рэспубліку Кіпр – краіну, дзе большасць насельніцтва – праваслаўныя. З 600 тысяч жыхароў дзяржавы амаль 25 тысяч чалавек належаць да каталіцкага Касцёла. Папа ўручыў патрыярхам усходніх Касцёлаў і біскупам Instrumentum laboris сходу спецыяльнага сіноду біскупаў для Блізкага Усходу, які адбудзецца ў кастрычніку 2010г.
    На экуменічнай сустрэчы 4 чэрвеня ў Пафасе Бэнэдыкт XVI заахвоціў памаліцца за адзінства ўсіх вучняў Хрыста. На сустрэчы побач са Святым Айцом і кіраўніком праваслаўнай Царквы на Кіпры арцыбіскупам Хрызастомам II былі таксама хрысціяне іншых веравызнанняў, якія належаць да армянскай, лютэранцкай і англіканскай супольнасцяў.
    Адна з мэтаў папскага паломніцтва - гэта ўзмацненне духу католікаў, якія жывуць на Кіпры і на Блізкім Усходзе. Папа заахвоціў кіпрскіх католікаў, каб яны “дапамагалі ствараць такі ўзаемны давер паміж хрысціянамі і нехрысціянамі як аснову для стварэння трывалага міру і згоды паміж народамі розных рэлігій, палітычных рэгіёнаў і культурных каранёў”. Практычным прыкладам міжрэлігійнага дыялогу была неспадзяваная сустрэча Папы з адным з духоўных аўтарытэтаў мусульманскай супольнасці на Кіпры 89-ці летнім шэйхам Мухамедам Назім Абіл Аль-Хаггані. Шэйх абняў Папу і папрасіў яго аб малітве.

9 тысяч ксяндзоў з 91 краінаў свету прыняло ўдзел у трохдзённай сустрэчы ў Рыме, якая закончыла год Святарства, які быў пачаты 19 чэрвеня 2009 г. і абвешчаны Папам у сувязі са 150-ай гадавінай смерці св. Яна Марыі Віянэя, пробашча з Арс. У 1929 годзе гэты святар быў названы папам Піем XI заступнікам пробашчаў. 11 чэрвеня б.г. Святы Айцец Бэнэдыкт XVI быў галоўным цэлебрантам св. Імшы на плошчы імя св. Пятра ў Рыме, якую разам з ім канцэлебравала 15 тысяч святароў з усяго свету. У гаміліі Папа звярнуў увагу на самыя важныя праблемы і пытанні, якія стаяць перад Касцёлам і духавенствам.

Вельмі важная для ўсіх хрысціянаў урачыстасць Божага Цела збірае заўжды шмат вернікаў. З яе нагоды працэсія, якая звыкла пераносіцца на найбліжэйшую нядзелю, павінна была адбыцца ў гэтым годзе (у якасці выключэння) у чацвер. У гэты дзень усе непакоіліся, як яна пройдзе, бо з раніцы было вельмі горача, а пасля абеду над горадам ля Нёмана павісла вялізная чорная хмара, якая прадвяшчала навальніцу. Вось-вось павінен быў хлынуць лівень, але нягледзячы на гэта на пагорку ля касцёла аа. францысканцаў сабралася мноства вернікаў. Галоўным цэлебрантам урачыстай св. Імшы быў біскуп Аляксандр Кашкевіч. Падчас яе разам з вернікамі маліліся святары і пробашчы ўсіх гродзенскіх парафій, а таксама грэка-каталіцкі архімандрыт, візітатар для грэка-католікаў у Беларусі Сяргей Гаек. Хор “Cantate Domino” упрыгожыў сваім спевам набажэнства. †

Закончыўся май і пачаўся чэрвень. Паводле традыцыі ў нашай краіне гэты месяц звязаны з набажэнствам да Найсвяцейшага Сэрца Езуса. Прызнаюся, што на працягу доўгага часу я задумваюся над розніцай паміж маёвым і чэрвеньскім набажэнствамі. Бачачы касцёлы, напоўненыя вернікамі падчас маёвых набажэнствах і пуставатыя ў чэрвені, я думаю з пэўным неспакоем аб тым, ці гэтая нашая “народная” пабожнасць мае правільны напрамак.
    Святы Айцец Ян Павел II быў вялікім прыхільнікам набажэнства да Сэрца Езуса. Ён вельмі радаваўся з таго факту, што ў Польшчы прысутнічае гэтая форма пабожнасці. Калісьці ён сказаў: “Я цешуся з-за таго, што ў Польшчы практыкуецца і няспынна падтрымліваецца ў чэрвені штодзённае адгаворванне ці спяванне літанія да Найсвяцейшага Сэрца Езуса”. †

Міхась вельмі любіў дражніць сваю сястрычку Палінку. Паліна вельмі крыўдзілася і плакала.
    - Чаго ты плачаш, Полечка? – аднойчы спытаў тата.
    - Мяне Мішка дражніць.
    - Ну і хай дражніць, а ты не паддавайся!
    Было вельмі цяжка не паддавацца, але адзін раз Поля паспрабавала, і вось што з гэтага атрымалася.
    Дзеці сядзелі за сталом і снедалі.
    - Вось толькі я падсілкуюся, - пачаў Міхась, - і тваю ляльку схаваю.
    - Ну і што, - засмяялася Поля, - можа маёй ляльцы цікава будзе ў хованкі пагуляць, бо ўсё роўна я знайду яе.
    †

Неабходныя матэрыялы:
пластыкавая шкляначка з-пад йагурта, ракавінкі, гліна, фарбы (фарбы для велікодных яйкаў або акрылавыя).
Спосаб падрыхтоўкі:
1. Размалюйце ракавінкі фарбамі розных колераў.
2. Высушыце іх.
3. Замясіце гліну.
4. Нанясіце гліну роўным слоем на шкляначку.
5. Уцісніце ракавінкі ў вільготную гліну і пакіньце сохнуць.
6. Размалюйце гліну белай фарбай.
7. Прасушыце.
8. Падстаўка для алоўкаў гатова.

Неабходныя прадукты:
250 гр. вафель, акрамя лімонных; 40 - 50 мл. малака, 10 гр. масла, 50 мл. сока з бурака, 10 мл. сока з лімона, цукар, галінка хвоі.
Спосаб прыгатавання:
1. Вафлі здрабніць у блэндары.
2. Дадаць гарачае малако і масла.
3. Замясіць “цеста”, скачаць шар.
4. Ад яго адшчыпваць невялікія кавалачкі і з іх скачаць маленькія шарыкі.
5. На некалькі секунд апусціць шарык у лімонны сок, а потым - у бурачны.
6. Затым адразу ж абкачаць іх у цукры і пакласці на талерку.
7. Хваёвыя іголкі прымацаваць да вішанек.
8. Паставіць іх у халадзільнік, каб хвосцікі добра трымаліся. Усім - прыемнага апетыту !!!