Езу, Ты гэтым займіся!

Малітва падзякі за 25 гадоў Гродзенскай дыяцэзіі
    Усемагутны і міласэрны Божа ў Тройцы Адзіны! Мы праслаўляем Цябе і дзякуем Табе за ўсе ласкі і даброты, якімі Ты надзяляў Божы люд Гродзенскай дыяцэзіі на працягу 25 гадоў!
    Просячы прабачэння за нашыя грахі і занядбанне, молім Цябе праз заступніцтва Марыі, Маці Міласэрнасці і Апякункі нашай, каб Ты і ў далейшым накіроўваў нас у сваім ласкавым Провідзе, адорваючы наш дыяцэзіяльны Касцёл супакоем і адзінствам, а таксама святымі пакліканнямі.
    Блаславі нашага Пастыра ў еднасці з усімі святарамі дыяцэзіі. Захоўвай у святасці нашыя сем’і, узмацняй веру і любоў да Цябе ў душах дзяцей і моладзі.
    Дазволь нам трываць з Табой у супольнасці з Паўсюдным Касцёлам, каб мы маглі жыць для Тваёй славы і няспынна Табе служыць! Праз Хрыста, Пана нашага. Амэн.

Малітва за маці
    Божа Ойча, дзякую Табе за любоў да маёй мамы, якая прывіта ў маім сэрцы. Не дапусці, каб гэтае пачуццё калі-небудзь згасла ўва мне; абарані мяне ад усяго, што магло б яе ўсхваляваць ці засмуціць, і не дазволь, каб я забыўся, што абавязаны ёй жыццём, выхаваннем і апекай. Я не магу аддзячыць ёй за ўсё дабро, якое яна мне зрабіла, таму Ты, о мой Божа, узнагародзь яе замест мяне. Спашлі на яе ўсё добрае, дазволь ёй доўга і шчасліва жыць, а мною пакіруй так, каб я заўсёды яе шанаваў і любіў, не прынёс ёй ніякіх непрыемнасцей, а з часам стаў апорай у яе старасці. Амэн.

Малітва за моладзь
   Малітва за моладзь Ойча наш, клапоцячыся пра моладзь, мы просім Цябе аб асаблівых ласках для яе. Дапамажы маладым людзям знайсці праўду, якой яны прагнуць, і ўчыні так, каб іх не сапсавалі падман і крывадушнасць свету. Захавай іх адчувальныя душы ад зла і амаральнасці, якія забіраюць сэнс жыцця і надзею, а таксама аддаляюць ад Цябе, Божа – адзінага дабра і нашай мэты. Пакажы ім, Ойча, як навукай і працай падрыхтавацца да прыняцця абавязкаў, якія чакаюць іх у жыцці. Няхай яны цешацца прыгажосцю свету і сваёй любоўю, няхай давяраюць бацькам і выхавальнікам. У Тваім Сыне, а нашым Пану Езусе Хрысце няхай знаходзяць дарогу, праўду і жыццё. Амэн.

Малітва за ненароджанае дзіця
   Малітва за ненароджанае дзіця Пане Езу, праз заступніцтва Марыі, Тваёй Маці, якая нарадзіла Цябе з любоўю, а таксама праз заступніцтва св. Юзафа, чалавека даверу, які апекаваўся Табой пасля нараджэння, прашу Цябе ў інтэнцыі гэтага ненароджанага дзіцяці, якое знаходзіцца ў небяспецы аборту. Прашу, дай яго бацькам любоў і адвагу, каб яны пакінулі свайму дзіцяці жыццё, якое Ты сам яму прадвызначыў. Амэн.

Малітва аб добрай жонцы
    Пане Божа, Ойча нябесны, Ты бачыш усё маё жыццё, так як я з вяршыні гары азіраю краявід, што ляжыць перада мною. Ты ведаеш, дзе жыве дзяўчына, якая калісьці, калі сустрэнецца са мной, пакіне бацьку свайго і маці і аддасць мне сэрца і руку, каб адгэтуль мы належалі адзін аднаму. Прашу ў Цябе разважлівасці і цярплівасці, каб я знайшоў добрую спадарожніцу і маці маіх дзяцей, якую Ты выбраў для мяне, перш чым мы нарадзіліся. Амэн.
   
    Малітва аб добрым мужу
    Ойча мой нябесны, калі Твая воля, каб я вышла замуж, ужо жыве дзесьці той чалавек, які мяне шукае, з якім я змагу з’яднацца, бацька маіх дзяцей. Ахіні яго апекай. Няхай ён застанецца чыстым, няхай будзе спакойным і высакародным – для Цябе і для мяне. Захавай таксама мяне для яго. Засей добрыя зярняты ў нашыя сэрцы цяпер, вясной нашага жыцця. Узмацні іх, каб наш будучы дом быў багаты на Твае ласкі. Амэн.

Хвала Хрысту! Дапамажыце, калі ласка, знайсці малітву за пераследуемых хрысціян. Дзякуй! (Святлана Пацук)

Малітва за пераследуемых хрысціян
   Малітва за пераследуемых хрысціян Дарагі Езу, Пане нястомнай любові, будзь з нашымі братамі і сёстрамі з усяго свету, якія пакутуць з-за Твайго імя. Мы чуваем і молімся сёння разам з імі. Верны Сябар і Збаўца, Ты ведаеш кожнага з іх па імені. Ты разам з імі трываеш у цярпенні, сам спазнаўшы крыжовую смерць. Няхай тыя, хто плача, адчуюць радасць ад даверу Табе, тыя, хто адчувае боль, няхай знойдуць у Табе ацаленне і адпачынак, а тыя, хто баіцца, атрымаюць Твой супакой і надзею.
   
    Пане, молімся таксама, каб тыя, хто іх праследуе, убачылі Тваю веліч і навярнуліся да Цябе. На хвалу Тваю, ласкавы Пане. Амэн.