280 гадоў таму, 19 (8) верасня 1730 г., адбылася каранацыя жыровіцкай іконы Багародзіцы папскімі каронамі.

На той час было вядома тры выявы жыровіцкай іконы Божай Маці, якія праславіліся цудамі.
    Першая – каменная, якая цудоўна з’явілася ў XV стагоддзі і знаходзілася ў Жыровічах.
    Другая – ікона-фрэска з базыліянскай царквы св. Сяргея і Вакха ў Рыме.
    Трэцяя (мастацкая копія другой) была напісана на палатне, як копія рымскай іконы-фрэскі.
    Гэтая ікона была каранавана папскімі каронамі і зараз знаходзіцца ў Слоніме, у касцёле св. Андрэя.
    Рашэнне «ўзлажыць на галаву Богадзіцяці Ісуса і Багародзіцы Дзевы ў г. Жыровіцах у царкве айцоў ордэна св. Васіля, Кіеўскага дыяцэза, залатыя кароны» было прынята ў 1726 годзе падчас пантыфікату папы Бэнэдыкта ХІII (29 V 1724 – 21 II 1730).
    Гэта была першая каранацыя папскімі каронамі абраза Божай Маці на тэрыторыі сучаснай Беларусі.
    На працягу стагоддзяў перад гэтай іконай маліліся грэка-католікі (уніяты), рыма-католікі, праваслаўныя. Жыровіцкая Заступніца стала сапраўды Маці еднасці хрысціянаў. †

МАЛІТОЎНАЕ СВЯТКАВАННЕ
    перад каранаванай іконай Жыровіцкай Божай Маці адбудзецца ў нядзелю 19 верасня 2010 г. у касцёле св. Андрэя ў Cлоніме.
    Урачыстасць узначаліць Апостальскі Нунцый у Беларусі арцыбіскуп Марцін Відовіч. У ёй прымуць удзел каталіцкія біскупы Беларусі, духавенства і вернікі лацінскага і візантыйскага aбрадаў.

    ПРАГРАМА ЎРАЧЫСТАСЦІ
    10.00 – Акатыст у гонар жыровіцкай іконы Багародзіцы (хор “ПРАСФАРА” з Мінска).
    11.00 – Літургія па візантыйскаму абраду.
    12.30 – Урачыстая працэсія з іконай Багародзіцы.
    13.00 – Святочная агапа для гасцей і пілігрымаў.